Urdu

حضور صلی اللہ علیہ وآلہ وسلم کی 63 سالہ زندگی کے مختلف ادوار کی 6 پیپر کٹنگ آرٹ میں مختصر منظر کشی کرنے کی کوشش کی گئی ہے۔ ان 6 ادوار کی پیپر کٹنگ آرٹ میں منظر کشی توصیف احمد ڈاٹ کام پر 6 پراجیکٹ کی صورت میں دستیاب ہے۔
یہ تمام آرٹ ورک گولڈن اور بلیک ورق کو کاٹ کربنایا گیا ہے۔ جیسا کہ اوپر بتایا گیا ہے کہ نبی کریم صلی اللہ علیہ وآلہ وسلم کی 63 سالہ زندگی کو 6 آرٹ ورک میں پیش کرنے کی کوشش کی گئی ہے۔ اس لیے ان 6 آرٹ پیس میں سے ہر ایک مکمل سٹوری اور واقعہ پیش کرتا ہے۔ اس موضوع کا انتخاب کرتے ہوئے مجھے بار بار خیال آتا رہا کہ میں اُس زمانے میں موجود ہی نہیں تھا تو شاید منظر کشی کرنے میں کچھ دشواری پیش آئے۔ لیکن پھر یہ سوچ کر تسلی ہوئی کہ آپ صلی اللہ علیہ وآلہ وسلم سے محبت اور آپ صلی اللہ علیہ وآلہ وسلم پر ایمان ہم سے اُس دور میں موجود ہونے کا تقاضا ہی نہیں کرتا۔ چونکہ اللہ تعالیٰ اور نبی کریم صلی اللہ علیہ وآلہ وسلم پر ایمان بالغیب ہمارے ایمان میں شامل ہے۔ اس لیے سیرت نبی صلی اللہ علیہ وآلہ وسلم کے چند واقعات پڑھ کراُس دور کا تصور کرکے منظر کشی کرنے کی کوشش کی ہے۔ باقی جو حسرت اور تشنگی ہے کہ کاش میں نے آپ صلی اللہ علیہ وآلہ وسلم کے ہوتے ہوئے جنم لیا ہوتا۔ آپ صلی اللہ علیہ وآلہ وسلم کے حجرے کے آس پاس کوئی کچا راستہ ہوتا۔ کاش احد میں شریک ہوتا اور پھر باقی نہ بچا ہوتا۔ میں بھی ہوتا غلام کوئی۔لاکھ کہتا میں نہ رہا ہوتا۔ آپ صلی اللہ علیہ وآلہ وسلم کی صحبت ملی ہوتی۔ میں بھی کتنا خوشنما ہوتا۔ رستہ ہوتا میں کاش مدینہ کا۔ اور آپ صلی اللہ علیہ وآلہ وسلم کا راستہ دیکھتا ہوتا۔ لیکن یہ حسرت ہی رہی اس تشنگی کو مٹانے کے لیے میری ہمیشہ خواہش رہی ہے کہ اُس سارے منظر نامے کو ایک آرٹ پیس کی شکل میں ترتیب دی جائے۔
پہلے آرٹ ورک Prophet Muhammad PBUH-1 میں بالکل درمیان میں ایک پہاڑ دکھایا گیا ہے۔ جس کے بائیں سے دائیں کی طرف ایک سیدھا راستہ بڑے سائز کے روز فلاور سے جا کر ملتا ہے۔ یہاں سے پہاڑ سے مراد غار حرا اورقد آدم روز فلاور یعنی نبی کریم صلی اللہ علیہ وآلہ وسلم جن کے وجود سے یہ کائنات معطر ہوئی۔ بلاشبہ آپ صلی اللہ علیہ وآلہ وسلم کے سامنے چاند اور ستاروں کی روشنی بھی ماند پڑجاتی تھی۔ آپ صلی اللہ علیہ وآلہ وسلم کو چاند سے دوں تشبیہ کا آسرا کیا؟ آپ صلی اللہ علیہ وآلہ وسلم خود ہی چاند ہیں تو چاند سا کیا؟
اسی ماحول میں جہاں خوبصورت پھول ہو وہاں پرندے تو آہی جاتے ہیں۔ اس آرٹ ورک میں بھی پھول کے ساتھ ٹہنیوں پہ پرندے دکھائے گئے ہیں جن سے مراد اُمت محمدیہ ہے۔ جن کو صراط مستقیم دکھانے کے لیے آپ صلی اللہ علیہ وآلہ وسلم مبعوث ہوئے۔
اس آرٹ ورک میں سب سے اوپر آسمان کی طرف دو پلرز دکھائے گئے ہیں کہ اس پوری کائنات کے اوپر ایک سپریم پاور بھی موجود ہے جو ہر وقت دیکھ رہا ہے اور ہر چیزاُس کے قبضہ قدرت میں ہے۔
اس آرٹ ورک میں سب سے نیچے عرب کے کچھ پہاڑ دکھانے کی کوشش کی گئی ہے۔جس پر کچھ بکریاں گھاس چرتی ہوئی نظر آرہی ہیں۔ یاد رکھیں بکریاں چرانا ہر نبی کی سُنت رہی ہے۔ اور اسی سنت کو زندہ رکھتے ہوئے ہمارے آخری نبی صلی اللہ علیہ وآلہ وسلم نے بھی چند قیراط کی اجرت پہ بکریاں چرائی ہیں۔ بلاشبہ آپ صلی اللہ علیہ وآلہ وسلم کا فقر اختیاری تھا۔ہمارے ہاں بکریاں چرانا اور فقر کا نام سنتے ہی فاقہ مستی، تنگدستی اور غریبی کا تصور آتا ہے۔ کہ فقیر ایسا شخص ہوتا ہے کہ جس کے تن کے اوپر ڈھنگ کے کپڑے نہ ہوں، بیماری اور بھوک سے برا حال ہو۔ مگر ” روحانی ” کائنات میں فقر ایک قابل رشک مرتبے کا نام ہے۔ روحانی دنیا میں بے نیازی، استغنا اور دنیاوی لزتوں سے بے نیاز ہونے کا نام فقر ہے۔ اور جب انسان اس مرتبے پر پہچتا ہے تو پھر ساری کائنات اس کے قدموں میں ڈھیر ہوجاتی ہے۔ اس لیے حضور صلی اللہ علیہ وآلہ وسلم نے ایک موقعہ پر فرمایا تھا کہ اگر ہم چاہیں تو یہ پہاڑ سونے کے ہوکر ہمارے ہم رکاب چلیں۔ اس لیے بکریاں چرانے سے مراد یہ نہیں کہ آپ صلی اللہ علیہ وآلہ وسلم غریب تھے۔ بلکہ آپ صلی اللہ علیہ وآلہ وسلم کا فقر اختیاری تھا۔
اسی آرٹ ورک میں پھول کے نیچے نبی کریم صلی اللہ علیہ وآلہ وسلم کی مہر مبارک یعنی مہر نبوت دکھانے کی کوشش کی گئی ہے۔ چونکہ گولڈن پیپر پہ مہر نبوت کا کام کیا گیا تھا اس لیے تصویر بناتے وقت کیمرے کے فلیش کی وجہ سے سیاہ رنگ نمایاں نظر آرہا ہے۔ جبکہ مہر نبوت کو ہارڈ کاپی میں گولڈن ورق پر مہر نبوت کا دیدار کیا جاسکتا ہے۔
اللہ تعالیٰ سے دعا ہے کہ اللہ کریم ہماری آنکھوں کو خیرا کرنے والے مناظر دکھائے۔ یا اللہ ہم نیکی دیکھنا چاہتے ہیں۔ ہمیں شر سے محفوظ رکھ۔ آمین یا رب العالمین۔